निर्वाचन तोकिएको समयमै हुनुपर्छ: प्रचण्ड

अनलाइन नेपाल

बुधवार , कार्तिक ५, २०८२

निर्वाचन तोकिएको समयमै हुनुपर्छ: प्रचण्ड

धनुषा । पूर्व प्रधानमन्त्री पुष्पकमल दाहाल प्रचण्डले तोकिएको समयमै निर्वाचन हुनुपर्नेमा जोड दिएका छन्।

जनकपुरमा पत्रकारहरुसँग कुराकानी गर्दै उनले सरकारले यसलाई गम्भीरतापूर्वक लिएर निर्वाचनको वातावरण बनाउनुपर्ने बताएका हुन्।

नेकपा माओवादी केन्द्रका संयोजक रहेका प्रचण्डले सरकारले हिजो संसदीय दलहरूसँग गरेको वार्ताले सरकार बिस्तारै निर्वाचनप्रति गम्भीर हुँदै गएको आभास दिए पनि अझै निर्वाचनको वातावरण नबनिसकेको बताए।

उनले भने- 'निर्वाचन तोकिएको समयमा हुनुपर्छ, सरकारले यसलाई गम्भीरतापूर्वक लिएर निर्वाचनको वातावरण बनाउनुपर्छ । हिजोमात्रै संसदीय दलहरुसँग जुन वार्ता भएको छ, सरकारको त्यसबाट सरकार विस्तारै निर्वाचनतिर गम्भीर हुँदै गएको आभाष त मिल्छ तर यतिबेला अझै पनि निर्णय गर्ने पार्टी माओवादी केन्द्रै बन्यो।'

उनले अन्तरिम सरकारले निर्वाचन घोषणा गरिसकेपछि निर्वाचनमै केन्द्रित हुनुपर्ने निर्णय गर्ने पहिलो पार्टी माओवादी केन्द्र बनेको स्मरण गराए।

उनले जेनजी आन्दोलनपछि सार्वजनिक रूपमा अपिल गर्ने र काठमाडौं उपत्यका बाहिर मधेस प्रदेशमा कार्यक्रम गर्ने पनि माओवादी केन्द्र नै पहिलो पार्टी भएको दाबी गरे।

प्रचण्डले भने- 'वामपन्थी एकता र ध्रुविकरणको कुरा समाजवादी मोर्चामा भएका पार्टी एकता प्रक्रियातिर हामी अघि बढेका छौँ । छठपछि नयाँ परिस्थिति देख्नुहुनेछ, वामपन्थी एकताको।'

वामपन्थी एकता र ध्रुवीकरणबारे बोल्दै प्रचण्डले समाजवादी मोर्चामा रहेका पार्टीहरू एकता प्रक्रियातर्फ अगाडि बढेको बताए। उनले छठ पर्वपछि वामपन्थी एकताको नयाँ परिस्थिति देखिने विश्वास व्यक्त गरे।

सम्बन्धित न्युज

प्रतिक्रिया दिनुहोस्

नयाँ अपडेट

थप नयाँ अपडेट

निर्वाचन तोकिएको समयमै हुनुपर्छ: प्रचण्ड