काठमाडौं । यूएईका विश्वविद्यालयमा पढ्न पठाउने भनी नेपाली विद्यार्थीबाट रकम असुल्ने कार्यमा संलग्न ५ जना कन्सल्टेन्सी सञ्चालक पक्राउ परेका छन् ।
केन्द्रीय अनुसन्धान ब्युरो (सीआईबी)ले पबेस्ट पाथ एजुकेसन प्रालिका कृष्ण थापा, मेर्की एजुकेसनका रामचन्द्र टन्डन, सिटीहब कन्सल्टेन्सीका सुवास सिलवाल क्षेत्री, कान्तिपुर एब्रोड कन्सल्टेन्सीका हेमराज भट्ट र दामोदर ढकाललाई पक्राउ गरेको हो ।
सीआईबीका अनुसार उनीहरूले नेपाली विद्यार्थीलाई यूएईका विभिन्न कलेजमा पठाउने भन्दै ८ लाखदेखि २२ लाख रुपैयाँसम्म लिने गरेको पाइएको छ । विद्यार्थीहरूलाई ठगेर फ्रान्स, अस्ट्रेलिया र अन्य देशका विश्वविद्यालयमा पठाउने झुठा वाचा गर्ने गरेको उजुरीमा उल्लेख छ।
शिक्षा मन्त्रालय, परराष्ट्र मन्त्रालय र सीआईबीमा १३ जनाले दिएको उजुरीका आधारमा उनीहरूलाई पक्राउ गरिएको हो।सीआईबीले थप अनुसन्धान थालेको छ ।