Jun 04 2026 | २०८३, जेठ २१ गते
04 Jun 2026 | बिहिवार, जेठ २१ गते २०८३
बिहिवार, जेठ २१ गते २०८३
Jun 04 2026 | २०८३, जेठ २१ गते
04 Jun 2026 | बिहिवार, जेठ २१ गते २०८३
बुधवार , कार्तिक २६, २०८२
काठमाडौं । नेपाल प्रहरीका महानिरीक्षक (आईजीपी) चन्द्र कुबेर खापुङ, प्रहरी नायव महानिरीक्षकद्वय ई. फणिन्द्र बराल र संजीव शर्मा दासलाई ३० वर्षे सेवा अवधि पूरा गरी बुधबार सम्मानपूर्वक बिदाइ गरिएको छ ।
नेपाल प्रहरी प्रधान कार्यालय, नक्सालमा आयोजित विशेष समारोहमा नवनियुक्त प्रहरी महानिरीक्षक दान बहादुर कार्कीले शुभकामना सहित उनीहरुलाई बिदाइ गरेका हुन ।
समारोहलाई सम्बोधन गर्दै अवकाशोन्मुख महानिरीक्षक खापुङले नेपालको राजनीतिक संक्रमणकालीन अवस्थामा प्रहरी संगठनको मनोबल उच्च राख्दै, संस्थाको अस्तित्व र प्रतिष्ठा जोगाउन आफूले सक्दो योगदान दिएको बताए ।
उनले संगठनभित्र भाइचारा, एकता र अपनत्वभाव कायम गर्न गरेको प्रयासबारे स्मरण गर्दै, नयाँ नेतृत्व र सबै प्रहरी सदस्यहरू मिलेर संगठनलाई अझ सुदृढ र सक्षम बनाउने अपेक्षा व्यक्त गरे ।
खापुङले नवनियुक्त आईजीपी कार्कीलाई बधाई दिँदै उहाँ व्यावसायिक, कर्तव्यनिष्ठ र दूरदर्शी नेतृत्वका धनी भएको बताए । 'उहाँको नेतृत्वमा नेपाल प्रहरी नयाँ उचाइमा पुग्नेछ भन्ने दृढ विश्वास छ,' उनले भने ।
कार्यक्रमका क्रममा आईजीपी खापुङले आफ्नो कार्यकालमा सम्पन्न उल्लेखनीय कार्यहरू र प्रगतिहरू समेटिएको कार्यसम्पादन प्रतिवेदन नवनियुक्त आईजीपी कार्कीलाई हस्तान्तरण गरे ।
त्यस अवसरमा आईजीपी कार्कीले सेवा अवधि पूरा गरी अवकाश लिन लाग्नुभएका वरिष्ठ अधिकृतहरूलाई हार्दिक बधाई दिँदै अग्रजहरूले थालनी गर्नुभएको मौलिक कार्य र मूल्य–मान्यतालाई निरन्तरता दिँदै संगठनलाई अझ सबल बनाउने प्रतिबद्वता व्यक्त गरे ।
उनले सेवा निवृत्त अधिकृतहरूबाट भविष्यमा पनि रणनीतिक सुझाव र सकारात्मक सल्लाह प्राप्त हुने विश्वास व्यक्त गरे ।
समारोहमा आईजीपी खापुङकी श्रीमती तथा नेपाल प्रहरी श्रीमती संघकी अध्यक्ष भावना श्रेष्ठ खापुङलाई पनि शुभकामना सहित बिदाइ गरिएको छ । उनलाई नव नियुक्त श्रीमती संघकी अध्यक्ष नविना कार्कीले बिदाइ गरिन ।
कार्यक्रममा प्रहरी अतिरिक्त महानिरीक्षकहरू, नायव महानिरीक्षकहरू, वरिष्ठ प्रहरी अधिकृतहरू, प्रहरी अधिकृत र जवानहरूको उपस्थिति रहेको थियो।
© 2026 All right reserved to onlinenepal.com
Design & Developed By
