काठमाडौं । भारतको उडिसास्थित कलिंग इन्स्टिच्युट अफ इन्डस्ट्रियल टेक्नोलोजी (केआईआईटी) मा अध्ययनरत थप एक छात्रा मृत भेटिएकी छन् ।
बारा सिम्रौनगढकी एक छात्रा बिहीबार साँझ केआईआईटीको छात्रावास ‘क्विन्स क्यासल–४’ (क्यूसी–४) को चौथो तलामा मृत अवस्थामा फेला परेकी हुन् ।
उनी आफ्नै कोठामा मृत अवस्थामा फेला परेको बताइएको छ । विश्वविद्यालयले नेपाली दूतावासलाई दिएको जानकारी अनुसार अहिले प्रहरीले घटनास्थल नियन्त्रणमा लिएको छ ।
घटनाको अनुसन्धान भइरहेको बताइएको छ । यसअघि पनि उक्त विश्विवद्यालयमा अध्ययनरत रुपन्देहीकी प्रकृति लम्साल छात्रावासमा मृत भेटिएकी थिइन् ।
त्यसपछि त्यहाँ आन्दोलन भएको थियो । कलेज प्रशासनको ज्यादतीका कारण असुरक्षित महसुस गरेर विद्यार्थीहरू घर फर्केका थिए ।