काठमाडौँ । बरिष्ठ लेखक एवं नागरिक समाजका अगुवा खगेन्द्र संग्रौलाले नेकपा माओवादी केन्द्रका महाधिवेशन प्रतिनिधिहरुलाई पुष्पकमल दाहाल ‘प्रचण्ड’लाई ‘भगवान’ घोषणा गर्न सुझाव दिएका छन् ।

लेखक संग्रौलाले अध्यक्ष प्रचण्डको राजनीतिक प्रतिवेदनमा सुझाव प्रस्तुत गर्ने क्रममा ‘प्रचण्ड युग’ र ‘प्रचण्ड विचार’ को घोषणा गर्न माग गरिएपछि व्यंगात्मक शैलीमा यस्तो सुझाव दिएका हुन् ।

सामाजिक सञ्जाल ट्वीटरमा संग्रौलाले प्रचण्ड युग र प्रचण्ड विचारको कुरा दासत्व मुद्राको चाकरी भएको पनि उल्लेख गरेका छन्।

‘माकेको महाधिवेशनमा एक उच्चस्तरीय भक्तले ‘प्रचण्ड युग’ र ‘प्रचण्ड विचार’को घोषणा गरियोस् भनी प्रभुका पाउमा विन्तीपत्र चढाएछन्। हैन, दासतुल्य मुद्रामा चाकरी नै गर्नु छ त ‘महामानव’, अझ ‘भगवान’ नै घोषणा गरे भैगो नि, किन खुद्रामसिना खिसखिस, कमरेड?’ ट्विटरमा उनले लेखेका छन्।

माकेकाे महाधिवेशनमा एक उच्चस्तरीय भक्तले “प्रचण्ड युग” र “प्रचण्ड विचार”काे घाेषणा गरियाेस् भनी प्रभुका पाउमा विन्तीपत्र चढाएछन्।हैन,दासतुल्य मुद्रामा चाकरी नै गर्नु छ त “महामानव”,अझ “भगवान्” नै घाेषणा गरे भैगाे नि,किन खुद्रामसिना खिसखिस,कमरेड?

— Khagendra Sangroula (@belakoboli) December 30, 2021

अध्यक्ष प्रचण्डको राजनीतिक प्रतिवेदनमाथि सुझाव दिँदै बागमती प्रदेश समूह प्रदेश ‘क’ का टोली नेता सरल सहयात्रीले नेकपा माओवादी केन्द्रमा जनयुद्धकालिन ‘प्रचण्ड पथ’लाई विउँत्याउन माग गरेका थिए ।