काठमाडौँ । प्रहरीको केन्द्रीय अनुसन्धान ब्यूरो (सीआईबी)ले ‘संरक्षित वन्यजन्तु गैंडाको खाग (आखेटोपहार)सहित दुई जनालाई पक्राउ गरेको छ।

पक्राउ पर्नेहरुमा तनहुँ जिल्ला शुक्लागण्डकी नगरपालिका-१० बस्ने ३४ बर्षीया फुलमाया बि.क र काठमाण्डौं जिल्ला तार्केश्वर नगरपालिका-०६, धर्मस्थली बस्ने बर्ष २८ बर्षीय सुसन सुनार रहेका छन्।

उनीहरुलाई काठमाडौँको सुकेधाराबाट विशेष सूचनाको आधारमा संरक्षित वन्यजन्तुको आखेटोपहारसहित पक्राउ गरिएको सीआईबीले जनाएको छ।

उनीहरुको साथबाट प्रहरीले ९ सय ग्राम गैंडाको खागजस्तो बस्तु समेत बरामद गरेको छ।

पक्राउ परेकाहरुलाई वरामद सामानसहित आवश्यक कानूनी कारवाहीको लागि डिभिजन वन कार्यालय हात्तीसार काठमाडौँमा बुझाइएको सीआईबीले जनाएको छ।