काठमाडौँ । प्रहरीको केन्द्रीय अनुसन्धान ब्यूरो (सीआईबी)ले अदालतबाट ४ दिन कैद र ११ लाख जरिवाना भएका एक जनालाई पक्राउ गरेको छ ।

सिआइबीले बैंंकिङ कसुर मुद्दामा उच्च अदालत पाटनले ११ लाख जरिवाना गरेपछि फरार रहेका महोत्तरी भगाहा-३ घर भई भक्तपुर सुर्यविनायक-८ सिपाडोल बस्ने ४५ बर्षीय रामनाथ सिंहलाई बुधबार पक्राउ गरी आज सार्वजनिक गरेको हो ।

सिआइबीका प्रवक्ता एवं प्रहरी उपरीक्षक श्यामकुमार महतोले उच्च अदालत पाटनको विसं २०७७ माघ २० गतेको फैसलापछि चार दिन कैद र बिगोबमोजिम रु ११ लाख जरिवानापछि फरार रहेका सिंहलाई कमलपोखरीबाट पक्राउ गरिएको जानकारी दिए ।

पक्राउ परेका सिंहले आफ्नो प्रभु बैंकको खातामा पर्याप्त मौज्दात रकम नहुँदा नहुँदै विभिन्न व्यक्तिलाई झुक्यानमा पारेर पैसा नभएको चेक दिइ बैंकिङ कसुरजन्य अपराध गरेका थिए ।

उच्च अदालतले उनलाई बैंकिङ कसुर तथा सजाय ऐन २०६४ बमोजिम फैसला सुनाएको थियो । पक्राउ परेका सिंहलाई फैसला कार्यान्वयनका लागि आज काठमाडौँ जिल्ला अदालतमा पेश गरिएको प्रवक्ता महतोले बताए।