काठमाडौं । नेपाल कम्युनिष्ट पार्टी (नेकपा) एमालेको संसदीय दलको बैठकमा पार्टीभित्र असन्तुष्ट रहेको झलनाथ खनाल-माधवकुमार नेपाल पक्ष अनन्त: सहभागी नहुने भएको छ।

यसअघि अध्यक्ष एवम् प्रधानमन्त्री केपी शर्मा ओलीले बोलाएको संसदीय दलको बैठकमा भाग लिन केही सांसदहरु सानेपाबाट हिँडिसकेका थिए ।

तर उनीहरु बीच बाटोबाटै फर्किएका छन्। ‘बिहानको अनौपचारिक छलफलबाट बैठकमा जाऔं भन्ने भयो । यसपछि हामी त हिँडिसकेका थियौं । फेरि अर्को सूचना आयो, हामी फर्कियौं’, नेपाल पक्षका सांसद दीपक प्रकाश भट्टले अनलाइन नेपालसँग भने।

तर वरिष्ठ नेता झलनाथ खनाल र माधवकुमार नेपालको उपस्थितिमा भएको छलफलले बालुवाटार नजाने निष्कर्ष निकाल्यो । ‘पहिले जाने भन्ने भयो, फेरि नजाने भन्ने भयो । अब हामी जान्नौं’, सांसद  भट्टले भने ।

बैठकमा नेताहरु माधवकुमार नेपाल, झलनाथ खनाललगायत स्थायी समिति सदस्य बाहेकका सांसदहरु दलको बैठकमा बालुवाटारतर्फ लागेको सो पक्षका एक सांसदले जानकारी दिए ।

हिजो प्रधानमन्त्री एवं पार्टी अध्यक्ष केपी शर्मा ओलीले आज ११ बजे दलको बैठक बोलाएका थिए । तर, खनाल-नेपाल पक्षले बुधबार पत्रकार सम्मेलन गरेर ओलीले डाकेको बैठकमा जान नसक्ने तर मिति परिवर्तन गरे सहभागी हुने जनाएका थिए।