काठमाडौं । सिन्धुलीमा जिप दुर्घटना हुँदा ४ जनाको मृत्यु भएको छ भने ७ जना घाइते भएका छन् ।

सिन्धुली सदरमुकाम सिन्धुलीमाडीबाट बाँसकोटतर्फ जाँदै गरेको बा१७च १११७ नम्बरको जिप कमलामार्इ नगरपालिका–७ करङडाँडामा आज दिउसो दुर्घटनामा पर्दा ४ जनाको घटनास्थलमै मृत्यु भएको हो ।

जिपमा ११ जना सवार थिए ।

जिल्ला प्रहरी कार्यालय सिन्धुलीका अनुसार दिउँसो पौने ४ बजे दुर्घटनामा परेको जिप सडकबाट ५० मिटर तल खसेको छ ।

मृत्यु हुनेमा कमलामाइ नगरपालिका बाँसकोटका अन्दाजी ६० वर्षका रुद्रबहादुर थापा, १८ वर्षकी रीता इस्माली, १९ वर्षकी दुर्गा श्रेष्ठ र उनका छोरा २ वर्षका मनिष श्रेष्ठ रहेको प्रहरीले जनाएको छ ।

प्रहरीका अनुसार चालक भोजबिक्रम थापासहित सबै घाइतेको जिल्ला अस्पताल सिन्धुलीमा उपचार भइरहेको र चालकको अवस्था गम्भीर भएकाले धुलिखेल पठाउने तयारी भइरहेको छ ।