वीरगञ्ज । जिल्ला अदालत पर्साले मुकेश चौरसियाको हत्या अभियोगमा पक्राउ परेका दुई जनालाई पुर्पक्षका लागि थुनामा राख्न आदेश दिएकाे छ।

नेपाल कम्युिनस्ट पार्टी (नेकपा) का कार्यकर्ता चौरसियाको हत्या अभियाेगमा पक्राउ परेका ५ जनामध्ये अन्य दुई जनालाई भने अदालतले २ लाख रुपैयाँ धरौटीमा छाड्न आदेश दिएको छ । एक जना नाबालक भने साधारण तारेखमा रिहा गर्दै अभिभावकको जिम्मा लगाउन आदेश दिएको अदालतका श्रेस्तेदार कृष्ण अधिकारीले जानकारी दिए ।

पर्सा जिल्ला अदालतमा थुनछेक बहसपछि न्यायाधीश नारायणप्रसाद शर्माको एकल इजलासले अखिलेश भनिने अशेसर प्रसाद चौरसिया र उत्तम भनिने निरञ्जन तिवारीलाई पुर्पक्षका लागि थुनामा पठाउने आदेश दिएकाे हाे ।

हनिफ मियाँ र देवा सहनीसँग २/२ लाख रुपैयाँ धरौटी माग गरिएको छ । बुधबार नै धरौटी बुझाएर उनीहरु रिहा भइसकेका छन् । कात्तिक ६ गते विन्दबासिनी गाउँ कमिटिको सपथ ग्रण समारोहमा दुई पक्षबीच झडप हुँदा मुकेश गम्भिर घाइते भएका थिए ।

त्यसको भोलिपल्ट उपचारको क्रममा मुकेशको मृत्यु भएको थियो । घटनामा संलग्न रहेको आरोपमा दुई पक्षबाट १ बालक सहित २८ जना विरुद्ध मुद्धा दर्ता गरिएको थियो ।