काठमाडौ । संघीय निजामती सेवा ऐन–नियममा कर्मचारीको २ बर्षमा सरुवा हुने प्रावधान राखिएको छ । सुशासनका हिसाबले यस्तो प्रावधान राखिएको भए पनि सहरी विकास तथा भवन निर्माण बिभागअन्तर्गतका कतिपय कर्मचारीहरु एउटै कार्यालयमा ७ बर्षसम्म कार्यरत रहेका छन् ।

बिभागका उपमहानिर्देशकदेखि महानिर्देशकसम्मलाई खुसी पारी त्यस्ता कर्मचारीहरु ७ बर्षसम्म एउटै कार्यालयमा कार्यरत रहेका छन् । एउटै कार्यालयमा कार्यरत कर्मचारीका कारण भ्रष्टाचार हुने गरेको छ ।

जेनजी समूहले भ्रष्टाचार बिरुद्ध प्रदर्शनश गरेपछि सत्ता नै परिवर्तन भएको छ । तर सहरी विकास तथा भवन निर्माण बिभागका उपमहानिर्देशक र महानिर्देशकहरु ७ बर्षसम्म रजगज गर्ने त्यस्ता कर्मचारीहरुलाई नियम अनुसार सरुवा गर्ने भन्दा पनि आर्थिक लाभ लिएर थमौती गर्नेतिर अग्रसर छन् ।

जेनजी समूहको प्रदर्शनलाई भवन बिभागका महानिर्देशक मचाकाजी महर्जन र उपमहानिर्देशक प्रकीर्ण तुलाधरले नजरअन्दाज गर्दै अझै पनि ७ बर्षसम्म एउटै कार्यालयमा बसी भ्रष्टाचार गरी अकूत सम्पत्ति आर्जन गरेका केही इन्जीनीयरहरुलाई सरुवा नगर्नेगरी डिल गरिसकेको समाचार स्रोत बताउँछ ।

बिभागका उपमहानिर्देशकदेखि महानिर्देशकसम्मलाई भ्रष्टाचारको हिस्सा बुझाएर ७ बर्षसम्म कार्यरत कर्मचारी हुन्–सहरी विकास मन्त्रालय मातहतको संघीय सहरी विकास तथा भवन निर्माण कार्यालय धनुषामा कार्यरत इञ्जिनिर लक्ष्मण यादव ।

उनी सात वर्ष देखि सोही कार्यालयमा कार्यरत छन् । पहुँच र शक्तिको भरमा उनी त्यो कार्यालय छाडेर अन्यत्र जान मान्दैनन । उनी लामो समयदेखि त्यही कार्यालयमा रजगज गर्दैआएका छन् ।

सात वर्षको बीचमा उक्त कार्यालयमा कार्यालय प्रमुख पटक–पटक फेरिए तर लक्ष्मणलाई भने सरुवा भएर अन्यत्र जानुपरेको छैन । उक्त कार्यालय उनका लागि आकर्षक ठाउ भएको छ ।

उक्त कार्यालयमा बसेर उनले ब्यापक भ्रष्टाचार गरेका गुनासा अख्तियार दुरुपयोग अनुसन्धान आयोगदेखि प्रधानमन्त्री कार्यालयमा पुगे पनि उनी सरुवा हुनुपरेको छैन ।

सहरी बिकास तथा भवन बिभागले उपसचिव (सीडीई)को सरुवा गरिसकेको छ । शाखा अधिकृत (इन्जीनीयर)को सरुवा गर्ने तयारी गरेको छ । संघीय सहरी विकास तथा भवन निर्माण कार्यालय धनुषाका इन्जीनीयर लक्ष्मण यादव यो पटक पनि सरुवा नहुने कुरामा ढुक्क् छन् ।

संघीय सहरी विकास तथा भवन निर्माण कार्यालय धनुषाका प्रमुख विनोद सिंहले आफ्नो बिभागका उपमहानिर्देशक प्रकीर्ण तुलाधर र महानिर्देशक मचाकाजी महर्जनसँग राम्रो सम्बन्ध भएकाले लक्ष्मण यादवको सरुवा थमौती गरिदिने गरी सबै सेटिङ मिलाउनेगरी जिम्मा लिएका छन् ।

बिनोद सिंहमार्फत् सेटिङ मिलाएर लक्ष्मण यादव आठौं बर्ष पनि धनुषामै थमौती हुने भएका छन् ।

हरेक वर्ष विभागले ठूलो संख्यामा इञ्जिनियरहरुको सरुवा गर्ने गर्छ । सामान्यता भदौ वा असोजमा निजामती कर्मचारीहरुको सरुवा हुने गरेको छ ।

तर लक्ष्मणले ७ वटा भदौ जनकपुरमै गुजारेर अरबौंको बजेटमा ठेकेदारसँग असुल्ने मौका पाई नै रहेका छन् । उनलाई २ बर्षे आबधिक सरुवाको ऐन कानुन लागू हुन सकेको छैन ।

विभागका उच्च अधिकारीलाई भ्रष्टाचारको हिस्सा बुझाएर ‘खुशी’ बनाएर उनले ऐन कानुन लागू गर्नबाट नै रोक्ने गरेका छन् । सहरी विकास मन्त्रीमा सुशासनका पक्षपाती कुलमान घिसिङ आएका छन् । उनी आएपछि बिभागले आवधिक सरुवा नीति लागू गर्ने अपेक्षा गरिएको छ ।