काठमाडौं । सहकारी ठगीको रकमबाट गितेन्द्रबाबु (जीबी) राईले खरिद गरी बिक्री गरेको काठमाडौंको भैंसेपाटीस्थित २३ रोपनी ७ आना जग्गा रोक्का भइसकेको खुलेको छ । सहकारी ठगीको अनुसन्धानमा क्रममा शंकास्पद कारोबार देखिएपछि जग्गा रोक्का भएको छ ।

आफुविरुद्ध प्रहरीले अनुसन्धान थालेपछि राईले सो जग्गा चेनी क्यापिटललाई बिक्री गरिएको थियो । बिक्री गरेलगत्तै सो कम्पनीका सञ्चालकले बैंकमा धितो राखेर ऋण लिइसकेका छन् । ठगीकै योजनाअनुसार यसरी जग्गा खरिद गरेलगत्तै ऋण लिइएको प्रहरीको आशंका छ ।

सो कम्पनी सुन तस्करीमा समेत मुछिएका बाजेको सेकुवा रेष्टुरेन्टका मालिक चेतन भण्डारी तथा भारत र नेपाल दुवैतर्फ नागरिकता भएका विवादास्पद व्यापारी पवन कुमार साहको हो । सो कम्पनीका सञ्चालकमा पवनकी श्रीमती रश्मादेवी र चेतनका आफन्त एकनाथको नाममा छ ।

अर्को पनि पढ्नैपर्ने

जीबीले १२ करोडमा बेचे २३ रोपनी जग्गा, ३ रोपनी धितो राख्दा १६ करोड ऋण ?

केही शेयर रक्षम इन्भेष्टमेन्ट कम्पनीको समेत नाममा रहेको स्रोत बताउँछ । रक्षम जीबीकै कम्पनी हो । जसकारण प्रहरीले सम्पत्ति शुद्धीकरण मुद्दामा सो कम्पनीका सबै सञ्चालकलाई समेत तान्ने सम्भावना छ ।

ललितपुर मालपोत कार्यालय स्रोतका अनुसार ८ मंसिर २०८० मै चितवन प्रहरीको पत्रअनुसार सो जग्गा रोक्का भइसकेको छ । चितवनको सहारा सहकारीको रकम समेत जीबीको समूहले ठगी गरेको घटनाको अनुसन्धानमा उनको जग्गा रोक्का भएको हो ।

सो जग्गा १ भदौ २०७९ मा बिक्री भएको मालपोत कार्यालयको तथ्याङक छ । त्यसअघि नै जिजीबीविरुद्ध प्रहरीमा उजुरी पर्न थालिसकेको थियो । आफूमाथि अनुसन्धान हुने देखेपछि सम्पत्ति जोगाउन उनले जग्गा बिक्री गरेका थिए ।

तर, त्यसरी सस्तोमा जग्गा हत्याएका व्यापारीद्वय भण्डारी र साहसमेत हाल छानबिनमा तानिएका छन् । स्रोतका अनुसार सिआइबीले उनीहरूमाथि समेत अनुसन्धान थालेको छ ।

अर्को पनि पढ्नैपर्ने

जीबी राईको ठगी प्रकरणमा मुछियो हिमालयन बैंक, छानबिन चल्दाचल्दै करोडौंको जग्गा बिक्री र ऋण प्रवाह

अनुसन्धानको क्रममा हिमालयन बैंक समेत पर्न सक्ने स्रोत बताउँछ । बैंकले धितोको अधिक मूल्याङकन गरेर मिलेमतोको आधारमा कर्जा प्रवाह गरेको थियो । सहकारी ठगीमा सो जग्गा रोक्का भएकाले बिक्री गरेर सहकारी पीडितलाई दिनुपर्ने हुन्छ ।

त्यो अवस्थामा बैंकको समेत करोडौं डुब्ने अवस्था छ । स्रोतका अनुसार हिमालयन बैंकका सिईओ अशोकशमशेर राणाले मिलेमतोका आधारमा सो कर्जा प्रवाह गरेका थिए । बैंकले १६ करोड ८० लाख रुपैयाँ कर्जा प्रवाह गरेको छ ।