काठमाडौं । नेपाली कांग्रेसका महामन्त्री विश्वप्रकाश शर्माले सहकारी ठगीमा गृहमन्त्री रवि लामिछानेको संलग्नता रहेको दाबी गरेका छन् ।

काठमाडौंको प्रदर्शनीमार्गमा विरोध सभालाई सम्बोधन गर्दै महामन्त्री शर्माले यस्तो बताएका हुन् ।

महामन्त्री शर्माले सहकारी प्रकरणमा सरकार असंवेदन बन्ने र संसद्‌मा बलजफ्ती गरेपछि प्रमुख प्रतिपक्षी सडकमा आउनुपरेको बताए।

महामन्त्री शर्माले भने,‘संसद्‌मा सरकारको भूमिका बलजफ्ती भयो । विश्वासको मत लिन प्रधानमन्त्रीले पाउनुहुन्छ । तर विश्वासको मत लिनका लागि उहाँहरूले कस्तो रवैया अपनाउनुभयो । यो छर्लङ्ग छ। सहकारीको अरबौं रुपैयाँ अपचलनमा गृहमन्त्रीको संलग्नता छ छानबिन गरौं भनेर हामीले आग्रह गर्दै आयौं तर हामीलाई पेल्ने नीति लिइयो ।’

उनले जनताको पैसामाथि बेइमानी गर्नेहरू कांग्रेसका लागि स्वीकार्य नभएको बताए ।

सहकारी ठगीमा गृहमन्त्री रवि लामिछाने नै संलग्न रहेको दाबी गर्दै संसदीय समिति गठनको माग राखेर सदन अवरोध गरिरहेको कांग्रेस आइतबारदेखि सडकमा उत्रिएको छ ।

गत फागुनमा गठबन्धन फेरिएर सहकारी ठगीमा मुछिएका लामिछाने गृहमन्त्री बनेपछि संसदीय छानबिन समितिको माग गर्दै सदन अवरोध गरिरहेको छ ।