गाजा । इजरायल र हमासबीच शुक्रबार बिहान अस्थायी युद्धविराम लागु भएपछि इन्धन र खाना पकाउने ग्यासले भरिएका ट्रकहरू गाजापट्टीमा प्रवेश गरेका छन् ।

प्यालेस्टिनी सुरक्षा स्रोतले नाम नछाप्ने सर्तमा बताएअनुसार इन्धन र खाना पकाउने ग्यास बोकेका ट्रकहरू गाजापट्टीमा ढुवानी गर्न विशेष क्षेत्रमा आइपुगेका छन् ।

योसँगै गाजापट्टी र इजिप्टबीचको विवादित भूमि पार हुँदै अन्य किसिमका मानवीय आपूर्ति पनि सहज हुने अपेक्षा गरिएको छ । हमासले प्रेस विज्ञप्तिमा भनेको छ, ‘युद्ध अवधिमा दैनिक २०० ट्रक राहत र चिकित्सा सामग्री र चार ट्रक इन्धन र खाना पकाउने ग्यास गाजापट्टीमा प्रवेश गर्नेछ।’

यसअघि, कतार र इजिप्टको मध्यस्थतामा इजरायल र हमासबीचको मानवीय युद्धविराम घेराबन्दीमा परेको तटीय क्षेत्रमा लागु भएको थियो ।

गत अक्टोबर ७ मा दक्षिणी इजरायलमा आक्रमण गर्दा हमासले बन्धक बनाएका १३ जनालाई रिहा गरेपछि इन्धन र खाना पकाउने ग्यासको आपूर्ति गर्ने योजना बनाइएको छ । रासस