काठमाडौं । भारतीय प्रधानमन्त्री नरेन्द्र मोदीको कालापानी भ्रमणलाई लिएर नेकपा एमाले नेता डा.भीम रावलले आपत्ति जनाएका छन् ।

प्रधानमन्त्री मोदीले नेपाललाई जानकारी नदिईकन नेपाली भूभागमा प्रवेश गरेको भन्दै नेता रावलले आपत्ति जनाएका हुन् । सरकार र प्रधानमन्त्रीले यस विषयमा जवाफ दिनुपर्ने नेता रावलको माग छ ।

नेता रावलले भने,‘लिपुलेक, कालापानी लिम्पियाधुरा नेपालको भूभाग हो । नेपालको नक्सामा नै ती क्षेत्रहरु समेटिएका छन् । त्यहाँ नेपालको जानकारी बेगर भारतीय प्रधानमन्त्रीले भ्रमण गर्नु सामान्य कुरा होइन।’

भारतीय प्रधानमन्त्री मोदी आजै बिहान हेलिकोप्टर चढेर आदि कैलाश र पार्वती कुण्डको दर्शन गर्न पुगेका छन् । उनको ट्विटर अकाउन्टबाट पार्वती कुण्डमा दर्शन गरेको फोटो पनि सार्वजनिक भएको छ ।

मोदीले नेपालको सिमानाभित्र रहेको गुञ्जिका सात गाउँमा स्थानीय बासिन्दासँग छलफल गर्ने बताईएको छ । एमाले नेता रावल यो निकै संवेदनशील विषय भएको बताए ।