काठमाडौं । नेपाल समाजवादी पार्टीका अध्यक्ष एवं पूर्व प्रधानमन्त्री डा. बाबुराम भट्टराईले काठमाडौं प्रहरीले प्रदर्शनकारीहरूलाई अमानवीय ढंगले कुटपिट गरेको बताएका छन् ।

उनले शुक्रबार बिहान सामाजिक सञ्जालमार्फत यस्तो बताएका हुन् । प्रहरीले गरेको अमानवीय क्रियाकलापलाई ढाकछोप गरेर, कुतर्क गरेर बस्ने हो भने लोकतन्त्रलाई के होला भन्दै प्रश्न पनि गरे ।

उनले सरकारका उच्च पदाधिकारीहरूले बेलैमा ध्यान नपुर्‍याए इतिहास निर्मम हुने चेतावनी दिए ।

उनले लेखेका छन्, ‘नेसपाका केन्द्रीय सदस्यहरू नेरूता तामाङ, मन्जु थापा मगर, मन्जु मिक्चान तामाङलगायत दर्जनौँ प्रदर्शनकारीहरूलाई काठमाडौं प्रहरीले हिरासतमा लिएर अमानवीय ढंगले कुटपिट गरेको भिडिओ, अडियो, फोटो र प्रत्यक्ष भोग्ने,देख्ने,सुन्ने साक्षी विद्यमान छन् । अझै पनि यसलाई ढाकछोप गरेर, कुतर्क गरेर बस्ने हो भने हाम्रो लोकतन्त्रलाई के भन्ने होला ? कुर्सीमा विराजमानहरूको बेलैमा ध्यान पुगोस् नत्र इतिहास निर्मम हुन्छ है ।’