प्युठान । प्युठानमा भएको कार दुर्घटनामा मृत्यु हुनेमध्ये सातजनाको सनाखत भएको छ । स्वर्गद्वारी मन्दिरको दर्शन गरेर फर्किने क्रममा कार दुर्घटना हुँदा आठजनाको मृत्यु भएको थियो । ती मध्ये सातजनाको सनाखत भएको हो ।

मृत्यु हुनेमा दाङको तुल्सीपुर उपमहानगरपालिका–१५, कोेठरी बस्ने ३५ वर्षीया सरिता शर्मा पाखरेल, उनका छोराहरू १४ वर्षीय विशाल र ९ वर्षीय विकास पोखरेल रहेका छन् ।

त्यस्तै, दाङको लमही नगरपालिका–७ गढवाका ४० वर्षीय गोविन्द शाह, उनका श्रीमती ३० वर्षीया राधा नेपाली, उनका छोरा ९ वर्षीय आदित्य शाह र कारका चालक लमही–५ का ४९ वर्षीय ताराबहादुर कुमालको सनाखत खुलेको जिल्ला प्रहरी कार्यालय प्युठानले जनाएको छ । एकजनाको भने सनाखत हुन बाँकी छ ।

स्वर्गद्वारी नगरपालिका–४, भ्यागुतेस्थित भिग्री स्वर्गद्वारी सडकखण्डमा लु १ च ६३४५ नम्बरको कार सोमबार दिउँसो अनियन्त्रित भई सडकबाट ५० मिटर तल खसेको थियो ।