काठमाडौं । नेपाली कांग्रेसका महामन्त्री विश्वप्रकाश शर्माले उपनिर्वाचनको परिणामले दलहरुलाई रुपान्तरित हुन सन्देश दिएको बताएका छन् ।

उपनिर्वाचन भएका तीनवटै क्षेत्रमा विजयीहरूलाई बुधबार बधाई तथा शुभकामना दिँदै महामन्त्री शर्माले पुराना दल तथा नेताले आफूलाई सच्याउनुपर्ने आवश्यकता रहेको बताएका हुन् ।

उनले यो सन्देश अनुरुप मतदाताको प्रत्येक मतलाई सम्मान गर्दै आफूलाई बदलेर नयाँ अभियानमा जुट्नुपर्ने बताएका छन् ।

महामन्त्री शर्माले सामाजिक सञ्जालमा लेखेका छन् ‘परिणामले हामीलाई रुपान्तरित हुन सन्देश दिएको छ । देशको समय बदल्न नेतृत्व गरेको दलले बदलिएको समय अनुरुप आफूलाई बदल्नुछ ।’

वैशाख १० गते सम्पन्न उपनिर्वाचनमा चितवन–२ बाट राष्ट्रिय स्वतन्त्र पार्टीका सभापति लामिछाने, तनहुँ–१ बाट सोही पार्टीका वाग्ले र बारा–२ बाट जनता समाजवादी पार्टी (जसपा) का अध्यक्ष उपेन्द्र यादव विजयी भएका छन्।