काठमाडौं । नेपाल समाजवादी पार्टी (नेसपा)का अध्यक्ष डाक्टर बाबुराम भट्टराईले आफ्नोबारेमा अनर्गल प्रचार गरिएको भन्दै आपत्ति जनाएका छन् । आफू स्वेच्छाले निर्वाचनको प्रतिस्पर्धामै नहुँदाहुँदै पनि तस्वीर राखेर अनर्गल प्रचार गरिएको भन्दै उनले आपत्ति जनाएका हुन् ।

सामाजिक सञ्जाल ट्वीटरमा उनले लेखेका छन्, ‘ उनीहरूको चर्मचक्षु भएपनि ज्ञानचक्षु छैन कि ? सामाजिक संजालमा फोहर ओकल्नेहरूको हिसाब इतिहासले राख्ने नै छ !’

निर्वाचनको मिति नजिकिएसँगै पछिल्लो समय सामाजिक सञ्जालमा विभिन्न पेज र ग्रुप बनाएर नेताहरूबारे भ्रामक, द्वेषपूर्ण र अनर्गल प्रचार भइरहेको छ ।

‘जो स्वेच्छाले चुनावी प्रतिस्पर्धामै छैन र स्वविवेकले भिन्न ढंगगको रूपान्तरणकारी राजनीतिको पैरवी गरिरहेको छ उसको समेत फोटो राखेर अनर्गल दुष्प्रचार गर्नेहरू कुन ग्रहबाट आएका हुन् ?’ उनले प्रश्न गरेका छन् ।

केही दिनअघि मात्रै निर्वाचन आयोगले सामाजिक सञ्जालको दुरुपयोग गरी भ्रामक प्रचार गर्ने पेज र ग्रुप बन्द गर्न निर्देशन दिएको छ । साथै यस्ता कार्य भइराखे प्रचलित कानून बमोजिम कारबाही गर्ने चेतावनी आयोगले दिइसकेको छ ।