चितवन । लागूऔषधसहित चार जनालाई भारतीय कारसहित प्रहरीले पक्राउ गरेको छ ।

पक्राउ पर्नेमा भारतको बिहारका ३८ वर्षीय सुनिल कुमार, १९ वर्षीय विकास कुमार, ५० वर्षीय राजन ठाकुर र बाराको गढीमाई नगरपालिका–१९ का ३५ वर्षीया प्रतिमा मण्डल रहेका छन् ।

उनीहरूलाई शुक्रबार भरतपुर बसपार्क चोकबाट पक्राउ गरिएको हो । पक्राउ परेका उनीहरुको साथबाट एक हजार एम्पुल डाइजेपाम, एक हजार एम्पुल व्युप्रिनर्फिन, फेनारगन एक हजार एम्पुल र एक सय ४० मिलीग्राम खैरो हेरोइन फेला परेको जिल्ला प्रहरी कार्यालय चितवनले जनाएको छ ।

कारका विभिन्न भागमा फल्स बटम (गोप्य डिब्बा) बनाएर लागूऔषध ओसारपोसार गर्ने गरेको प्रहरीले जनाएको छ ।

मोबाइल चार थान, डिएल सात सिएम १५७६ नंको भारतीय कारसमेत बरामद गरिएको छ । थप अनुसन्धान भइरहेको प्रहरीले जनाएको छ ।