काठमाडौं । सशस्त्र प्रहरी बल (एपीएफ) र भारतको सशस्त्र सीमा बल (एसएसबी) बीच भएको छैठौं समन्वयात्मक बैठक बिहीबार सम्पन्न भएको छ ।

यही असोज ११ गतेबाट सशस्त्र प्रहरी बल मुख्यालय हल्चोकमा सुरु भएको सो बैठकले बिहीबार सीमापार अपराध नियन्त्रण सम्बन्धी सम्झौता पत्रमा हस्ताक्षर गरेको हो ।

बैठकमा एपीएफका तर्फबाट महानिरीक्षक राजु अर्याल र एसएसबीको तर्फबाट महानिर्देशक सुजय लाल थाओसेनले सम्झौतापत्रमा हस्ताक्षर गरे ।

दुई देशबीचको सीमा सुरक्षालाई थप प्रभावकारी बनाउन उक्त सम्झौता भएको सशस्त्र प्रहरी नायव उपरीक्षक शैलेन्द्र थापाले जानकारी दिए ।

सीमापार अपराध नियन्त्रण गरी सीमा सुरक्षालाई थप सुरक्षित बनाउन दुई सुरक्षा निकायबीच निरन्तर समन्वय र सहकार्य तथा सूचना आदान प्रदान गर्ने सहमति भएको उनले बताए ।

साथै सीमा नाकामा हेल्प डेस्क स्थापना गर्ने कार्यलाई निरन्तरता दिँदै सीमा क्षेत्रमा प्रभावकारी कार्य गर्ने पनि सहमति भएको छ ।