महोत्तरी । ठगी आरोपमा पक्राउ परेका महोत्तरी भंगाहा ५ का अनिरुद्ध साह पुर्पक्षका लागि कारगार चलान भएका छन् ।

मिटरब्याजबाट गरिब र विपन्नलाई ठगी गरेको आरोपमा मुद्दा लागेका उनलाई जिल्ला अदालत महोत्तरीले कारगार चलान गरेको हो ।

महोत्तरी, धनुषासहित तराईका जिल्लामा गरिब तथा विपन्न परिवारलाई ऋण दिएर चार गुणासम्म बढी रकम असुल्ने र जायजेथा हडप्ने गरी जालसाजी कागजात बनाउँदै उठिबास लगाएको भन्दै साहविरुद्ध मुद्दा परेपछि एक महिनाअघि महोत्तरी प्रहरीले उनलाई पक्राउ गरेको थियो ।

जिल्ला अदालत महोत्तरीमा बुधबार भएको बहसपछि उनी जेल चलान भएको जिल्ला प्रहरी कार्यालय महोत्तरीले जनाएको छ ।१९ जनाको जाहेरीपछि पक्राउ परेका साहविरुद्ध अहिले पनि जिल्ला प्रहरीमा निवेदन पर्नेक्रम जारी छ ।

५ बिघा पुर्ख्यौली सम्पत्ति भएका साहको अहिले ९३ विघा जग्गाजमिन रहेको अहिलेसम्मको अनुसन्धानबाट खुलेको प्रहरीले जनाएको छ ।