काठमाडौं । नेकपा एमालेका सांसद भीम रावलले नेपाली नर्स बेलायत नपठाउन माग गरेका छन् ।

बुधबार प्रतिनिधिसभा अन्तर्गत रहेको अन्तर्राष्ट्रिय सम्बन्ध समितिमा अमेरिकी सहयोग परियोजना एसपीपी र भुतपुर्व सिंगापुर गोर्खा सैनिक बारेको छलफलका क्रममा उनले बेलायतमा गोर्खा भर्ती जस्तै नेपाली नर्स भर्ती गर्न नहुने बताए ।

नेपालका दुर्गम क्षेत्रमा रहेका अस्पताल, स्वास्थ्य संस्थामा नर्सलगायत स्वास्थ्यकर्मीको अभाव रहेको भन्दै उनले नेपाली दक्ष जनशक्ति बेलायत निर्यात गर्न नहुने बताए ।

सांसद रावलले बेलायतको उच्चस्तरीय समितिले १० देखि १५ हजार नर्स भर्ना नगर्ने हो भने स्वास्थ्य क्षेत्रमा समस्या आउने प्रतिवेदन बुझाएको २ दिनपछि नेपाल सरकारले बेलायतमा नर्स पठाउने निर्णय गरेको भन्दै सरकार कोबाट परिचालित छ भन्दै प्रश्न गरे ।

उनले भने, ‘नेपालको विकट क्षेत्रमा हेर्ने हो भने अझै उपचारका लागि नर्स छैनन् । एउटा देशलाई चाहियो भन्दैमा गोर्खा भर्ती गरेजस्तै नर्स भर्ती गर्ने ? नेपालीले यत्रो दुख गरेर तयार पारेको जनशक्ति विदेशीलाई सुम्पने ?’ सांसद रावलले सरकारले बेलायतमा नर्स पठाउने सम्झौता कहिले गर्यो, यसबारेमा के भईरहेको छ संसदलाई जानकारी गराउन माग गरे ।