काठमाडौं । नेकपा एमालेका अध्यक्ष केपी शर्मा ओलीले नेत्र विक्रम चन्द ‘विप्लव नेतृत्वको नेपाल कम्युनिस्ट पार्टीलाई सूर्य चिह्नमा चुनाव लड्न आग्रह गरेका छन् ।

मंगलबार ललितपुरमा आयोजित कार्यक्रममा ओलीले विप्लवलाई लोकतन्त्र मास्ने षडयन्त्रको मतियार नबन्न आग्रह गरेका हुन् ।

पाँच दलीय गठबन्धन विप्लवलाई देखाएर चुनाव सार्ने षडयन्त्रमा लागिरहेको ओलीको आरोप थियो ।

‘दर्ता खुलेका बेलामा दर्ता नगर्ने, प्रक्रियामा सामेल नहुने । विप्लवजीले चुनावमा भाग लिने हो भने स्वतन्त्र रुपले लाग्नुपर्छ,’ ओलीले भने, ‘होइन भने, तपाईंहरूका कार्यकर्ताले जित्ने ठाउँमा उठाउनुस् । पार्टी तपाईंहरूकै रहन्छ, कार्यकर्ता तपाईंकै रहन्छन् तर सूर्य चिह्नबाट आरामसँग चुनाव लड्नुस् ।’