काठमाडौँ । नेकपा एमालेका नेता डा भीम रावल र नेकपाका महासचिव नेत्रविक्रम चन्द विप्लवबीच भेटवार्ता भएको छ । बिहीबार दिउँसो रावललाई भेट्न विप्लव पार्टीका प्रवक्ता खड्गबहादुर विश्वकर्मा ‘प्रकाण्ड’लाई लिएर रावल निवास टोखा पुगेका थिए ।

विप्लवसँगको भेटवार्ताबारे जानकारी दिँदै रावलले सामाजिक सञ्जालमा लेखेका छन् ,’आज नेकपाका महासचिव नेत्र विक्रम चन्द ‘विप्लव’ र नेता खड्ग विश्वकर्मासंग मेरो घरमा भेटवार्ता भयो ।’

विप्लवसँगको भेटमा राष्ट्रिय स्वाधीनताको लागि सबै देशभक्त एक हुन र मोर्चा बनाउनेलगायत छलफल भएको रावलको भनाइ छ।

‘उहाँहरूले राष्ट्रिय स्वाधीनताको लागि सबै देशभक्त एक हुन र मोर्चा बनाउन जोड दिनुभयो,’ रावलले ट्विटरमा लेखेका छन्, ‘ देशभक्तहरू एक हुने कुरा उचित भएको र हाल आफ्नो ठाउँबाट भूमिका खेल्नु उचित हुने मेरो विचार रह्यो।’

आज नेकपाका महासचिव नेत्र विक्रम चन्द ‘विप्लव’ र नेता खड्ग विश्वकर्मासंग मेरो घरमा भेटवार्ता भयो। उहाँहरूले राष्ट्रिय स्वाधीनताको लागि सबै देशभक्त एक हुन र मोर्चा बनाउन जोड दिनुभयो। देशभक्तहरू एक हुने कुरा उचित भएको र हाल आफ्नो ठाउँबाट भूमिका खेल्नु उचित हुने मेरो विचार रह्यो।

— Dr. Bhim Rawal (@BhimRawal179) March 3, 2022

पछिल्लो समय विप्लवले एमसीसीमा असन्तुष्ट रहँदै आएका नेताहरुसँग भेटवार्ता गरिरहेका छन्। बिप्लवले रावललाई भेट्नुअघि नेकपा माओवादी केन्द्रका नेता नारायणकाजी श्रेष्ठ, एकीकृत समाजवादीका नेता झलनाथ खनाल र नेपाल मजदूर किसान पार्टीका अद्यक्ष नारायणमान बिजुक्छेलगायतका नेताहरुलाई भेट गरेका थिए।

एमसीसी संशोधनविना अनुमोदन गर्न नहुने, एमसीसीलाई राष्ट्रघाती बताउँदै आएका नेताहरु र एमसीसीबाट आउने अनुदान नै ल्याउन नहुने धारणा राख्दै आएका विप्लवबीचको भेटवार्तालाई अर्थपूर्ण रुपमा हेरिएको छ।