एजेन्सी – चार दिने अमेरिका भ्रमणमा रहेका भारतीय प्रधानमन्त्री नरेन्द्र मोदीविरुद्ध अमेरिकामा प्रदर्शन गरिएको छ।

प्रदर्शनकारीहरुले ह्वाइट हाउसअघि मोदीविरुद्ध नाराबाजी गरेका छन्। दर्जनौँ भारतीय–अमेरिकी नागरिकहरूले विभिन्न प्लेकार्ड र पर्चा बोक्दै मोदीको विरोध गरेको अन्तर्राष्ट्रिय सञ्चारमाध्यमले जानकारी दिएका छन्।

प्रदर्शनकारीहरुले ‘भारतलाई फासिज्मबाट बचाउ’, ‘मुस्लिम र अन्य अल्पस्ंख्यकमाथिको अत्याचार बन्द गर’, ‘मानव अधिकार हनन बन्द गर’, ‘मोदी फिर्ता जाउ’ लगायतका नारा लेखेको प्लेकार्ड बोकेका थिए।

सन् २०१४ मा मोदी भारतको प्रधानमन्त्री बनेदेखि उनीमाथि देशमा हिन्दूवाद बढेको र मुस्लिम र अन्य अल्पसंख्यक समूहमाथि विभेद गरेको आरोप लागिरहेको छ।

क्वाड सम्मेलनका लागि यतिबेला मोदी अमेरिकामा छन्। मोदी शनिबार न्यूयोर्कमा जारी संयुक्त राष्ट्रसंघको वार्षिक साधारण सभामा समेत भाग लिनेछन्।