काठमाडौं। नेकपा एमालेका नेता तथा पूर्वमन्त्री प्रभु साहले प्रचण्ड नेतृत्वको नेकपा माओवादी केन्द्र  अवैध रहेको  आरोप लगाएका छन्। ।

रौतहटको मौलापुर नगरपालिकाको बजेट अधिवेशन उद्घाटन गर्दै  साहले हेटौँडा अधिवेशनपछि कुनै अधिवेशन नभएको र हेटौँडामा अधिवेशन भएको पार्टीको नाम नेकपा माओवादी केन्द्र नै नभएको स्पष्ट पारेका छन् ।

निर्वाचन आयोगमा दर्ता नै नभएको पार्टीसित एकीकरण गरिएको तथा एकीकरण भएपछि कुनै अधिवेशन नै नरहेको हुनाले पार्टीको नाम र अध्यक्ष दुवै अवैध रहेको नेता साहले तर्क गरेका छन् ।

मौलापुर नगरपालिकाको बजेट अधिवेशन चलिरहँदा प्रतिपक्षीहरुले विरोध प्रदर्शन गरेका थिए ।

विरोध प्रदर्शनमा उत्रेको समूहको प्रतिकारमा प्रभु साहका समर्थक र प्रदर्शनमा उत्रेका बीच दोहोरो भीडन्त भएको थियो।

दोहोरो ढुँगा हानाहानलाई प्रहरीले रोक्न खोज्दा प्रहरी नै दुवैतिरबाट निशाना बनेको थियो ।

स्थितिलाई नियन्त्रणमा लिन प्रहरीले दर्जनौँ राउन्ड अश्रु ग्याँस तथा हवाई फायर गरेको छ । प्रहरीले २३ राउन्ड अश्रु ग्याँस तथा १४ राउन्ड हवाई फायर गरेको छ। यसै क्रममा दुवैतिरबाट भएको ढुंगा प्रहारबाट नौ प्रहरी र तीन सशस्त्र प्रहरी घाइते भएका छन्।