काठमाडौं । पूर्वगृहमन्त्री रवि लामिछाने मुछिएको कास्कीको सूर्यदर्शन सहकारीको ठगी अनुसन्धानमा प्रहरीले चलखेल गरेको भेटिएको छ । सहकारी ठगीको रकमबाट खरिद गरिएका जग्गा समेत जोगाएर मुद्दा दायर गरिएको छ । जसले सहकारी पीडितको पैसा नउठ्ने जोखिम बढेको छ ।

ठगीका नाइके गितेन्द्रबाबु (जिबी) राईले ललितपुरको भैंसेपाटीमा २३ रोपनी सात आना जग्गा खरिद गरेका थिए । आफुविरुद्ध उजुरी पर्न थालेपछि केही पैसा लिएर हतार हतार सो जग्गा चेनी क्यापिटल नामक कम्पनीको नाममा लगिएको थियो । तर, प्रहरीले सो जग्गा जफतको मागदाबी लिएको छैन । जबकी चितवन प्रहरीले एक वर्षअघि नै सो जग्गा रोक्का राखेको थियो ।

चेनी क्यापिटलमाथि कास्की प्रहरीले अनुसन्धान गरेको छ तर चलखेलको आधारमा सो कम्पनी र कम्पनीका सञ्चालकलाई उन्मुक्ति दिएपछि प्रश्न उठेको छ ।

चेनी क्यापिटलका सञ्चालकमा चेतनाथ भण्डारी, पवन कुमार शाह र कुमार रम्तेल छन् । भण्डारी बाजेको सेकुवा रेष्टुरेन्टका मालिक हुन् । उनीहरुसँग कास्की प्रहरीले कागज गराएकोमा साक्षी बनाएर मुद्दा दायर गरेको छ । जबकी रम्तेल सो सहकारी ठगीका मुख्य आरोपी हुन्। हाल उनी थुनामा छन् ।

कास्की प्रहरीले चेतनाथ र पवनकुमारसँग कागज समेत गरेको थियो । जसमा सो कम्पनीमा रम्तेलको ३० प्रतिशत शेयर कसरी भयो भन्नेमा प्रश्न सोध्दा भण्डारीले प्रष्ट जवाफ दिन सकेका छैनन् ।

एकपटक प्लटिङका लागि बाटो बनाइदिने सर्तमा भनेका छन् अर्को पटक डेढ करोड दिएर शेयर लिएको भनेका छन् । अर्कोतर्फ उनले जिबीसँग एकपटक एक करोड रुपैयाँ समेत लिएको देखिन्छ । त्यसको स्रोत उनले खुलाउन सकेका छैनन् ।

भैंसेपाटीको सो जग्गाको बजार मुल्य डेढ अर्ब भन्दा धेरै छ । तर, उनीहरुले मालपोतबाट २५ करोड ९० लाखमा खरिद गरेको देखाएका छन्। भैंसेपाटी जस्तो ठाउँमा आनाको सात लाखका दरले जग्गा खरिद गरेको भनेर झुक्याइको छ । खासमा जिबीको सम्पत्ति लुकाउन मात्र उनीहरुले सहयोग गरेको स्रोत बताउँछ ।

अर्बको सम्पत्ति भएकाले त्यसलाई जोगाउन उच्च तहको चलखेल चलेको थियो । त्यही कारण सो जग्गा जफतको दाबी नै नलिएको स्रोत बताउँछ ।

अर्को पनि पढ्नैपर्ने

जीबीले बेचेको २३ रोपनी जग्गा प्रहरीद्वारा रोक्का, हिमालयन बैंकको १६ करोड जोखिममा

जबकी रवि लामिछाने तथा छविलाल जोशीको हकमा भने उनीहरुका श्रीमतीको नाममा रहेका पुर्ख्यौली जग्गा समेत जफतको लागि मागदाबी लिइएको छ । यो प्रकरणले प्रहरी अनुसन्धानमाथि गम्भीर प्रश्न उठेको छ ।

सहकारी ठगीको रकमबाट २०७९ भदौ १ गते खरिद गरेको उक्त जग्गा १५ दिनपछि भदौ १५ गते हिमालयन बैंक न्यूरोड शाखामा धितो राखी १६ करोड ८० लाख रुपैयाँ ऋण लिइएको छ । १२ करोड ५० लाखमा २३ रोपनी ७ आना जग्गा खरिद गरेको र पूरै जग्गा धितो नराखी ३ रोपनी धितो राखेर १६ करोड ८० लाख कर्जा लिइएको छ ।

१२ करोड ८० लाखमा २३ रोपनी ७ आना जग्गा सस्तोमा पाएँ भनेर खरिद गरेका साह र भण्डारीले सिधै सहकारी पीडितलाई ठगी गर्न खोजेको देखिन्छ । पीडितहरुले समेत २२ माघ २०८० मा दिएको पूरक जाहेरीमा चेनी क्यापिटलको नाम समेत उल्लेख गरेका थिए।

नेपालमा बिटुमिनको काम गर्ने र भन्सारमा क्लीयरिङ गर्ने धन्दामा सक्रिय पवनकुमार साह नेपाल र भारतको दोहोरो नागरिकताधारी हुन् ।

बिहार घर भएका साहले रौतहटको चन्द्रनिगाहापुरबाट बंशजका आधारमा कसरी नेपाली नागरिकता लिए ? प्रहरीले यसबारेमा समेत अनुसन्धान गर्नुपर्ने देखिन्छ ।

प्रहरीले खोज्दै जाँदा नक्कली बाबु बनाएर नागरिकता लिएको बिषयमा पनि अनुसन्धान हुने भएपछि साह सम्पर्कबिहीन बनेका थिए ।

बाजेको सेकुवाका भण्डारी ३३ किलो सुन तस्करी तथा सनम शाक्य हत्या प्रकरणमा समेत मुछिएका पात्र हुन् । उनीहरुले प्रहरीमा सेटिङ मिलाएर बयान दिएको स्रोत बताउँछ ।