काठमाडौं। प्रधानमन्त्री केपी शर्मा ओलीले सोमबारको मन्त्रिपरिषद बैठकबाट लिम्पियाधुरासमेत समेटेर नेपालको नयाँ नक्सा पारित गरेपछि जनता समाजवादी पार्टीका नेता डा. बाबुराम भट्टराईले ट्वीट गर्दै ओलीलाई ‘अल्पज्ञानी ‘को संज्ञा दिएका छन् ।

उनले ट्वीटरमा लेखेका छन्,-‘प्रम केपी शर्मा ओलीको ३ घण्टाको स्पष्टीकरण सुन्दा उहाँमा आफ्ना कमीकमजोरी स्वीकार्ने र सच्चिने कुनै छाँटकाँट देखिएन ।

कोरोना, राष्ट्रियता, लोकतन्त्रका व्याख्यान सुन्दा अल्पज्ञान र अहंकारको भयंकर ककटेल देखियो । लिपुलेक नक्साको ब्याज भजाएर अकंटक कुशासन चलाउने र देशलाई बर्बादीमा लैजाने बुझियो ।’

बाबुरामको ट्वीटले सामाजिक सन्जालमा विभिन्न खालका प्रतिक्रिया आएका छन्।

पूर्व अर्थ सचिव रामेश्वर खनालले बाबुरामलाई जवाफ दिंदै ट्वीट गरेका छन्- ‘एउटा कुरा के बुझियो भने अरुलाई अल्पज्ञानी भन्ने मान्छे स्वयम अल्पज्ञानी हुने हुँदो रहेछ। तर आफु अल्पज्ञानी भएको भेउ पाउँदैन। यो बुझेपछि म अल्पज्ञानी छु भनेर सोच्दा आनन्द आयो’