काठमाडौं । संस्कृति, पर्यटन तथा नागरिक उड्डयन मन्त्रालय मातहत ३३ जना पदमुक्त भएका छन् ।

सार्वजनिक पदाधिकारीको पदमुक्तिसम्बन्धी विशेष व्यवस्था अध्यादेश, २०८३ जारी भएसँगै नेपाल पर्यटन बोर्डका प्रमुख कार्यकारी अधिकृत (सीईओ) दीपकराज जोशीसहित मन्त्रालय मातहत ३३ जना पदमुक्त भएका हुन् ।

बोर्डमा सीईओ जोशीसँगै सदस्यहरू नरेन्द्रकुमार देव, कुमारमणि थपलिया, ऋषिराम भण्डारी, राजेन्द्रबहादुर लामा र रामप्रसाद सापकोटा पदमुक्त भएका छन् ।

त्यस्तै पशुपति क्षेत्र विकास कोष अर्न्तगत सदस्यसचिव प्रकाशमणि शर्मा, कोषाध्यक्ष श्रीधर सापकोटा, सदस्य हरिनाथ ढकाल, शिक्षित पराजुली, बाबुशरण सुवेदी, डा. भरतप्रसाद बडाल, रामेश्वर संगत, रेनुका पराजुली र राजुकुमार खत्री पदमुक्त भएका छन् ।

यसैगरी नेपाल वायुसेवा निगमका कार्यकारी सञ्चालक अमृतमान श्रेष्ठ र सञ्चालक समिति सदस्य रामप्रसाद खतिवडा समेत पदमुक्त भएका छन् ।

यता भौतिक पूर्वाधार तथा यातायात मन्त्रालय मातहतका निकायबाट पनि २० पदाधिकारी पदमुक्त भएका छन् । मन्त्रालयका अनुसार नेपाल इन्जिनियरिङ परिषद्‌बाट सर्वाधिक १३ पदाधिकारी पदमुक्त भएका छन् ।

जसमा अध्यक्ष प्रा. डा. पदमबहादुर शाही, उपाध्यक्ष इ.डा. विकास अधिकारीरहेका छन् भने नेपाल रेल्वे बोर्डका रेल्वे प्रशासक बलराम मिश्रसहित ३ जना रहेका छन् ।

यस्तै सडक बोर्ड नेपालका ४ सदस्य पनि पदमुक्त भएका भएको मन्त्रालयले जनाएको छ ।

आजै राष्ट्रिय खेलकुद परिषद्का १९ पदाधिकारीहरु पदमुक्त भएका थिए।

प्रधानमन्त्री वालेन्द्र शाह (बालेन) नेतृत्वको सरकारले प्रशासनिक सुदृढीकरण र राज्यका निकायहरूलाई नयाँ गति दिने उद्देश्यले चालेको यो कदमसँगै विभिन्न ऐन र संरचनाअन्तर्गत राजनीतिक नियुक्ति खारेज गर्न उक्त अध्यादेश राष्ट्रपति रामचन्द्र पौडेल समक्ष सिफारिस गरेको थियो ।

राष्ट्रपति पौडेलले सार्वजनिक पदाधिकारीको पदमुक्तिसम्बन्धी विशेष व्यवस्था अध्यादेश, २०८३ जारी गरेसँगै उनीहरु पदमुक्त भएका हुन्।

यसरी प्रशासनिक तथा सामाजिक क्षेत्र, कृषि, वातावरण, प्रज्ञा प्रतिष्ठान, सामाजिक क्षेत्र, ऊर्जा, पूर्वाधार, वित्तीय र नियमनकारी निकाय, स्वास्थ्य, चिकित्सा र विज्ञान क्षेत्र, शिक्षा तथा विश्वविद्यालय क्षेत्र र सञ्चार, हवाई सेवा र मुद्रण क्षेत्र गरी १,५९४ जना पदाधिकारीहरू पदमुक्त हुने भएका छन्। सरकारले अब यी रिक्त पदहरूमा नयाँ नियुक्ति प्रक्रिया चाँडै अगाडि बढाउने तयारी गरेको छ।