काठमाडौं । राष्ट्रपति रामचन्द्र पौडेलका आर्थिक सल्लाहकार चिरञ्जीवी नेपालले दिएको राजीनामा स्वीकृत भएको छ ।

राष्ट्रपति कार्यालयले नेपालको राजीनामा स्वीकृत भएको जनाएको हो। नेपालको एक सय रुपैयाँको नोटमा नयाँ नक्सा प्रकाशित गर्नेसम्बन्धी विषयबारे उनले बोलेको विषयमा यसअघि राष्ट्रपतिले नै उनीसँग सोधखोज गरेका थिए ।

त्यसपछि नेपालले विज्ञप्ति जारी गरेर आफ्नो बचाउ गरेका थिए ।  मन्त्रिपरिषदको निर्णयको विरुद्ध अभिव्यक्ति दिएपछि विवादमा परेका नेपालले पदबाट राजीनामा दिएका थिए ।

यस विषयमा राष्ट्रपति पौडेल आफैले बोलाएर उनीसँग सोधपुछ गरेका थिए ।

नेपालको जवाफबाट राष्ट्रपति सन्तुष्ट भएका थिएनन्। उनले राष्ट्रबैंकलाई संशोधित संविधानको नक्सा राख्न दिने निर्णयलाई लहडको संज्ञा दिएका थिए ।