काठमाडौं । प्रहरीको केन्द्रिय अनुसन्धान ब्यूरो (सिआईबी)ले नेकपा माओवादी केन्द्रका उपाध्यक्ष तथा पूर्वसभामुख कृष्णबहादुर महरा हाजिर जमानीमा छाडेको छ ।

सीआईबीले महराको बयान सकिएपछि उनलाई हाजिरी जमानतमा छाडेर थप अनुसन्धान प्रक्रिया अघि बढाउने तयारी गरेको हो ।

जिल्ला सरकारी वकिल कार्यालय काठमाडौंको सहमतिमा सिआईबीले उनलाई हाजिर जमानी छाड्ने निर्णय गरेको स्रोतले बतायो ।

इलेक्ट्रिक चुरोट ‘भेप’मा लुकाएर ल्याएको सुनबारे अनुसन्धान गर्न प्रहरीले चैत ५ मा उनलाई रुपन्देहीबाट पक्राउ गरेको थियो ।

सिआईबीका अनुसन्धान अधिकृतहरुले दुई दिन लगातार महराको बयान लिए । महरालाई छोरा निर्मलको जिम्मा लगाइएको प्रहरी स्रोतले बतायो ।

अर्का छोरा राहुल भने सुन तस्करी प्रकरणकै अनुसन्धानमा पुर्पक्षका लागि थुनामा छन् । सुन तस्करी प्रकरणमा महरामाथि छानबिन भने जारी रहनेछ।

स्वास्थ्य अवस्था कमजोर भएका कारण उनी नर्भिक अस्पतालमा उपचाररत छन् ।