काठमाडौं । राप्रपा नेपालका अध्यक्ष कमल थापाले गृहमन्त्री रवि लामिछानेलाई आफैँमाथि लागेको सहकारी ठगीको आरोपमा सही ढंगले छानबिन चुनौती दिएका छन् ।

हिन्दु राष्ट्र र राजसंस्था पुनर्स्थापनासहित माग राख्दै बिहीबार काठमाडौंमा आयोजना गरेको प्रदर्शनपछि आयोजित सभामा थापाले यस्तो चुनौती दिएका हुन् ।

उनले ललिता निवाससहित विभिन्न प्रकरणमा मुछिएका राजनीतिक पृष्ठभूमिका व्यक्तिहरूलाई कारबाही गरेर देखाउन पनि गृहमन्त्रीलाई चुनौती दिए ।

ललिता निवास, सुन तस्करी प्रकरणमा ठूला व्यक्तिहरूलाई जोगाउने काम भएको भन्दै उनीहरूलाई कारबाही गरेर देखाउन गृहमन्त्रीलाई उनले आग्रह गरे ।

सरकार र राजनीतिक दलहरूका कारण नेपाली युवाहरू खाडी मुलुकमा जान बाध्य भएको भन्दै उनले मुलुकको वर्तमान व्यवस्था पूर्णरूपमा असफल भएको जिकिर गरे ।