कञ्चनपुर । तस्करीमा संलग्न व्यक्तिहरुबाट अनुचित लाभ लिएको आरोपमा इलाका प्रहरी कार्यालय गड्डाचौकीका इन्चार्जसहितका १६ जना प्रहरी जिल्ला तानिएका छन् ।

भारतबाट साइकलमा सामान ओसारपसार गर्ने महिला तथा अन्य व्यक्तिहरुबाट अनुचित लाभ लिएको गुनासोपछि अनुसन्धानका लागि इन्चार्जसहितको टिमलाई नै जिल्ला तानिएको हो ।

प्रहरी नायब निरीक्षक (सई) दिग्गज ठकुराठीसहितका १६ प्रहरीलाई बुधबार राति जिल्ला तानिएको जिल्ला प्रहरी कार्यालय कञ्चनपुरले जनाएको छ ।

उनीहरुमाथि भारतबाट सामान क्यारिङ गर्ने महिला तथा तस्करीमा संलग्न व्यक्तिहरुबाट अनुचित लाभ लिएको आरोप छ ।उनीहरुमाथि अनुचित लाभ लिए÷नलिएको विषयमा अनुसन्धान हुने बताइएको छ ।

बुधबार राति नै ठकुराठीको ठाउँमा प्रहरी वरिष्ठ नायब निरीक्षक (सई) महेन्द्रसिंह थापालाई इन्चार्जको जिम्मेवारीसहित १६ जना प्रहरीलाई इलाका प्रहरी कार्यालय गड्डाचौकी पठाइएको छ ।