काठमाडौं । मेडिकल व्यवसायी दुर्गा प्रसाईँले आयोजना गरेको प्रदर्शनमा भाग लिन काठमाडौं आएका महिलाहरुमाथि एमालेको भातृ संगठन युवा संघका कार्यकर्ताले दुर्व्यवहार गरेका छन् ।

मंगलबार राति चाबहिलस्थित एक पार्टी प्यालेसमा सुतिरहेको अवस्थामा अमानवीय तवरले महिलाहरुलाई युवा संघका कार्यकर्ता बताउने एक समूहले लखेटेको हो ।

सुतिरेहका महिलाहरुलाई ओछ्यानबाटै उठाएर लखेटिएको भिडियो सार्वजनिक भएको छ । इटहरीबाट आएका दुई दर्जन जति महिलाहरुलाई लोकन्थलीको इन्द्रसार पार्टी प्यालेसमा बस्ने व्यवस्था मिलाइएको थियो ।

राति ११ बजेतिर एउटा समूह सो पार्टी प्यालेसमा घुसपैठ गरेर सुतिरहेका महिलाहरुलाई उठाएको भिडियो सार्वजनिक भएको छ ।

दुर्व्यवहारपछि महिलाहरु आफ्नो सामानसहित मध्यरातमा बाहिर निस्किएका थिए । उनीहरुलाई लखेटेपछि ‘दुर्गा प्रसाईं पागललाई फोन गर्नु त युवा संघले लघार्यो भनेर ।’ भन्दै भिडियोमा बोलेको सुनिन्छ ।