काठमाडौं । कार्यबाहक प्रधानमन्त्री एवम् रक्षामन्त्री पूर्णबहादुर खड्कासँग नेपालका लागि जनवादी गणतन्त्र चीनका राजदूत चेन सोङ्गले शिष्टाचार भेट गरेका छन् ।

मंगलबार उनीहरुबीच मन्त्रालयमा भेटवार्ता भएको हो । भेटमा कार्यबाहक प्रधानमन्त्री एवम् रक्षामन्त्री खड्काले नेपाल र चीनबीच सदियौं पुरानो दुई पक्षीय सुमधुर सम्बन्ध रहेको बताए ।

उनले नेपाल एक चीन नीतिप्रति सदैव दृढ रहेको र नेपालको भूमि चीनविरुद्ध प्रयोग हुन नदिने प्रतिबद्धता व्यक्त गरे ।

उनले नेपाली सेनाको क्षमता अभिवृद्धिमा चीनले पुर्‍याउँदै आएको सहयोगका लागि चीन सरकारलाई धन्यवाद व्यक्त गरे । राजदूत चेन सोङ्गले नेपालका प्रधानमन्त्रीको आसन्न भ्रमणलाई चीन सरकारले उच्च प्राथमिकता दिएको बताए ।