काठमाडौं । नेपाली कांग्रेसका महामन्त्री विश्वप्रकाश शर्माले सुन तस्करी प्रकरणको सम्बन्धमा प्रधानमन्त्री र गृहमन्त्रीले संसद बैठकमा जवाफ दिनुपर्ने बताएका छन् ।

राज्य व्यवस्था तथा सुशासन समितिको बैठकमा बोल्दै महामन्त्री शर्माले यस्तो बताएका हुन् ।

महामन्त्री शर्माले प्रधानमन्त्री पुष्पकमल दाहाल प्रचण्ड र गृहमन्त्री नारायणकाजी श्रेष्ठको जवाफ सुन्ने अधिकार सिंगो संसदको भएको बताए।

छानबिनको माग गर्दै संसद बैठक अवरुद्ध गर्नु समस्याको समाधान नभएको भन्दै छलफलबाट समाधानमा पुग्नुपर्ने महामन्त्री शर्माको भनाई छ ।

नेपाली कांग्रेसले भ्रष्टाचारको वर्ग, जाति, धर्म, सम्प्रदाय केही पनि नहुने र भ्रष्टाचार केवल भ्रष्टाचार हुने भन्दै कुनै मोलाहिजा नराखीकन सरकारले छानबिन गर्नु पर्ने ठहर गरेको उनले बताए।

विमानस्थलबाट सरकारको कमजोरीका कारण सुन तस्करी भएको भन्दै सिनामंगल चोकमा सरकारले नै सुन समातेको उनले बताए ।