काठमाडौं । नक्कली भुटानी शरणार्थी प्रकरणमा थुनामा रहेका पूर्वगृहमन्त्री तथा नेपाली कांग्रेसका नेता बालकृष्ण खाँणलाई भेट्न परराष्ट्रमन्त्री एनपी साउद कारागार पुगेका छन् ।

बिहीबार विहान १० बजे मन्त्री साउद पूर्वगृहमन्त्री खाँणलाई भेट्न केन्द्रीय कारागार सुन्धारा पुगेका हुन् । भेटका क्रममा समसामयिक राजनीतिक विषयमा कुराकानी भएको जनाईएको छ ।

जिल्ला अदालत काठमाडौंले १ असारमा खाँण, पूर्वउर्जामन्त्री टोपबहादुर रायमाझीसहित १६ जनालाई पुर्पक्षका लागि थुनामा पठाउने आदेश दिएको थियो । पार्टी राजनीतिमा खाँण र साउदको समकालिन नेता हुन् ।

अदालतको आदेश कार्यान्वयनका क्रममा जिल्ला प्रहरी परिसर, काठमाडौंले उनीहरुलाई केन्द्रीय कारागार लगेको थियो । २९ असार २०७८ देखि १३ माघ २०७९ सम्म गृहमन्त्री भएका बेला नेपाली नागरिकलाई भुटानी शरणार्थी बनाएर अमेरिका पठाउँछु भन्दै असुली गर्ने गिरोहलाई सहयोग हुने गरी काम गरेको आरोप खाँणमाथि छ ।