काठमाडौं । राष्ट्रिय प्रजातन्त्र पार्टीका अध्यक्ष राजेन्द्र लिङदेनले प्रधानमन्त्री पुष्पकमल दाहाल ‘प्रचण्ड’ले देशका नदीनालाहरू भारतलाई सुम्पने काम गरेको आरोप लगाएका छन् ।

पार्टीनिकट राष्ट्रिय प्रजातान्त्रिक भूतपूर्व सैनिक संगठनले शनिबार काठमाडौंमा आयोजना गरेको एक कार्यक्रममा उनले यस्तो आरोप लगाएका हुन् ।

प्रधानमन्त्री प्रचण्डको हालै सम्पन्न भारत भ्रमणप्रति संकेत गर्दै उनले त्यहाँको नयाँ संसद् भवनमा नेपालको भूमि सामेल गरिएको नक्सा राख्दा पनि किन त्यसो गरिएको भनेर प्रश्न गर्न नसकेको भन्दै आपत्ति जनाए ।

देश संकटमा परेको उनको भनाई छ । उनले देशको सुरक्षाका लागि आन्दोलनमा उत्रिन भूतपूर्व सैनिकहरूलाई आह्वान पनि गरे ।