काठमाडौं । नक्कली भुटानी शरणार्थी प्रकरणमा पक्राउ परेका पूर्वगृहमन्त्री बालकृष्ण खाँणको आजदेखि बयान लिइने भएको छ ।

जिल्ला सरकारी वकिलको कार्यालय काठमाडौँले आजदेखि कांग्रेस नेतासमेत रहेका खाँणको बयान लिन लागेको हो । खाँण बुधबार बिहान चाबहिलस्थित उनकै निवासबाट पक्राउ परेका थिए ।

जिल्ला अदालत काठमाडौँले तीन दिन थुनामा राखेर अनुसन्धान गर्न अनुमति दिएको छ ।

पछिल्लो बयानमा हिरासतमा रहेका तत्कालीन गृहसचिव टेकनारायण पाण्डेले नै खाँणको संलग्नता रहेको बयान दिएपछि प्रहरीले खाँणलाई बुधबार उनको निवासबाटै पक्राउ गरेको थियो ।