दोलखा । दोलखाका १० मतदान केन्द्रमा मध्याह्न १२ बजेसम्म ३५ प्रतिशत मतदान सम्पन्न भएको छ ।

मुख्य निर्वाचन अधिकृत डिल्लीरत्न श्रेष्ठका अनुसार आज बिहान ७ बजेदेखि मतदान सुरू भएको मतदानमा अहिलेसम्म ३५ प्रतिश मतदान सम्पन्न भएको छ ।

शान्तिपूर्ण तरिकाले मतदान भइरहेको र मतदाता उत्साहित देखिएको समेत उनले जानकारी दिए ।

श्रेष्ठका अनुसार मतदान केन्द्रमा बिहानैदेखि मतदाताको बाक्लो उपस्थिति छ । आज वैतेश्वर गाउँपालिका–२, जनज्योति माध्यामिक विद्यालय पुतलीकाठ मतदान केन्द्र ‘क’ र ‘ख’, सोही गाउँपालिका–३ को कालिढुङ्गा माध्यमिक विद्यालय मतदान केन्द्र ‘क’, ‘ख’ र ‘ग’ मा पुनः मतदान भइरहेको छ ।

सोही गाउँपालिका ६ को वैतेश्वर मावि मतदान केन्द्रको ‘क’, ‘ख’ र ‘ग’ तथा तामाकोशी गाउँपालिका–३ हेल्थ पोष्ट भवन जफे मतदान केन्द्र ‘क’ र ‘ख’ मा पुनः मतदान गराइएको हो ।

गत ४ गते सम्पन्न निर्वाचनमा धाँधली भएको उजुरीपछि निर्वाचन आयोगले पुनः मतदान गराउने निर्णय गरेको हो । १२ दिनअघिको तुलनामा आजदेखि २ प्रतिशत मत बढी खस्ने अनुमान गरिएको छ ।