बारा। नेकपा एमाले छाडेर स्वतन्त्र उम्मेदवारी दिएका प्रभु साह र बद्री न्यौपानेले कांग्रेसका बागी इच्छाबहादुर वाग्लेलाई समर्थन गरेको छन् ।

बारा क्षेत्र नम्बर ४ बाट प्रतिनिधि सभा सदस्य निर्वाचनमा उम्मेदवार बनेका इच्छाबहादुर वाग्लेलाई साह र न्यौपानेले साथ दिएका हुन् ।

उनीहरुले आज मंगलबार संयुक्त रुपमा फेटा गाउँपालिका क्षेत्रीय सभा आयोजना गरेका छन् । सभालाई वाग्लेसहित, साह र न्यौपानेले पनि सम्बोधन गर्ने कार्यक्रम छ ।

बारा क्षेत्र नम्बर ४ मा सत्ता गठबन्धनको तर्फबाट एकीकृत समाजवादीका कृष्णकुमार श्रेष्ठ किसान र एमाले–जसपा गठबन्धनबाट एमालेका एकबाल मिया उम्मेदवार छन् ।

सत्ता गठबन्धनको भागबण्डामा बारा–४ एकीकृत समाजवादीको भागमा परेपछि पूर्व श्रममन्त्री श्रेष्ठले टिकट पाएपछि इच्छाबहादुर वाग्लेले बागी उम्मेदवारी दिएका थिए ।

प्रभु साहको अभियानमा एमाले केन्द्रीय सदस्य त्यागेर बद्रि न्यौपाने पनि लागेका छन् । न्यौपाने चुरे भावर पार्टी त्यागेर एमाले प्रवेश गरेका थिए ।

चितवनमा अयोजित एमालेको दशौं महाधिवेशनबाट न्यौपाने केन्द्रीय सदस्यसमेत भएका थिए । एमालेले चुनावमा जसपासँग गठबन्धन गरेपछि रुष्ट साह र न्यौपाने दुवै मिलेर ‘स्वतन्त्र उम्मेदवार जिताऔं अभियान’ चलाएका छन् ।