कञ्चनपुर । कञ्चनपुरका विभिन्न नदी किनारका बस्तीमा बाढी पसेको छ । शुक्रवारदेखि भइरहेको अविरल वर्षासँगै आएको बाढीले नदी किनारका वासिन्दा विस्थापित भएका छन् ।

शुक्लाफाँटा नगरपालिकाको वनहरा शिविरका ३० घरका १२० जना विस्थापित भएका छन् । भूमिहीन, सुकुम्वासीहरू शिविरमा बस्दै आएका छन् ।

बस्तीमा बाढी पसेपछि रातिदेखि नै शुक्लाफाँटा नगरपालिकाका प्रमुख रणबहादुर महरा, उपप्रमुख कल्पना पन्त, सशस्त्र प्रहरी र स्थानीयले उद्धारको काम गरिरहेका छन् ।

यस्तै, कृष्णपुर नगरपालिका–१ दोमिल्ला, पुतलीबजार, श्रीपुर, २ नम्बर वडाको वनहरा, वाणी शिविर, ५ नम्बर वडाको बबित्रा बस्ती, गुलरिया बजार, ८ नम्बर वडाको मझगाउँ लगायत ठाउँ जलमग्न र डुबानमा परेका नगर प्रमुख हेमराज ओझाले जानकारी दिए ।

यसैगरी बर्दिया, कैलाली, कञ्चनपुर, डडेलधुरा, डोटी, सुर्खेत आसपास भारी वर्षा भएको जल तथा मौसम पूर्वानुमान महाशाखाले जनाएको छ । यी जिल्ला भएर बहने नदी तथा खोलामा आकस्मिक बाढीको जोखिम छ।

कैलालीको कर्णाली नदी चिसापानी जलमापन केन्द्रमा जलसतहले सतर्कता तह पार गरेको छ । बर्दिया र कैलालीको कर्णाली नदी तटीय क्षेत्र र डुबान भइरहने होचा भू–भागमा बिहान १० बजेसम्म उच्च सतर्कता अपनाउन भनिएको छ ।