जनकपुर । युवतीको नग्न तस्बिर सार्वजनिक गरी ब्ल्याकमेल गरेको आरोपमा धनुषाबाट एक प्रहरी जवान पक्राउ परेका छन् ।

रौतहटको भवानीपुर गाउँपालिका–४ बस्ने २७ वर्षीय कृष्णकुमार यादव पक्राउ परेका हुन् ।

बटेश्वर प्रहरी चौकी धनुषामा कार्यरत यादवलाई बुधबार पक्राउ गरी जिल्ला अदालत काठमाडौंबाट ५ दिनका लागि म्याद थप गरी अनुसन्धान भइरहेको साइबर ब्यूरोका प्रवक्ता एसएसपी नवीन्द अर्यालले जानकारी दिए ।

अर्यालका अनुसार यादवले युवतीलाई सामाजिक सञ्जालमा साथी बनाई म्यासेज, च्याट, भिडियो कल गर्ने र सोही क्रममा पीडितलाई प्रलोभनमा पारी खिचेका नग्न तस्बिरहरु सामाजिक सञ्जाल ह्वाट्सएप र फेसबुकमा पोस्ट गर्ने गरेको पाइएको छ ।

साथै, पीडितलाई धाकधम्की दिएको पाइएकाले उनलाई पक्राउ गरिएको पनि प्रहरीले जनाएको छ ।