काठमाडौं । प्रधानमन्त्री शेरबहादुर देउवाले पर्व इद (इद उल फित्र) ले नेपाली राष्ट्रिय एकता र अखण्डतालाई थप मजबुत बनाउने बताएका छन् ।

नेपालसहित विश्वभरका इस्लाम धर्मावलम्बीहरूको पर्व इदका अवसरमा स्वदेश तथा विदेशमा रहेका सम्पूर्ण इस्लाम धर्मावलम्बी नेपालीमा सुख, शान्ति, सु–स्वास्थ्य र प्रगतिको शुभकामना व्यक्त गर्दै प्रधानमन्त्री देउवाले यस्तो बताएका हुन् ।

इदले सबै समुदायबीच आपसी भाइचारा र सद्भाव अभिवृद्धिमा प्रेरणा प्रदान गर्न सकोस् भन्ने उनको कामना छ । उनले शुभकामना सन्देशमार्फत धार्मिक, सांस्कृतिक विविधताभित्रको एकता पहिचान भएको उल्लेख गर्दै धर्म, संस्कार र संस्कृति अमूल्य निधि भएको र यस्ता अमूल्य निधिको संरक्षण र सम्वर्द्धन गर्नु सबैको साझा दायित्व भएको बताएका छन् ।

प्रधानमन्त्री देउवाले राज्यले पनि यसको संरक्षण, विकास र प्रवद्र्धनको नीति लिएको उल्लेख गर्दै हाम्रा चाडपर्व, सांस्कृतिक रीतिरिवाज र रहनसहनको संरक्षण र सम्वर्द्धन गर्न यस पर्वले सबैलाई थप प्रेरणा मिल्ने विश्वास व्यक्त गरेका छन् ।