काठमाडौं । आसन्न स्थानीय तह निर्वाचनमा महानगरपालिका प्रमुख र उपप्रमुखका उम्मेदवार चयनका लागि बोलाइएको नेपाली कांग्रेसको केन्द्रीय कार्यसम्पादन समितिको बैठक फेरि सरेको छ ।

शनिबार बिहान ११ बजेका लागि तय भएको बैठक दिउँसो २ बजेलाई सारिएको कांग्रेस मुख्य सचिव कृष्णप्रसाद पौडेलले जानकारी दिए ।

पार्टीका शीर्ष नेताहरूबीच बालुवाटारमा अनौपचारिक छलफल चलिरहेको हुँदा बैठक सारिएको हो । शुक्रबार दिउँसो ३ बजेका लागि बोलाइएको बैठक आज ११ बजेका लागि सारिएको थियो ।

सभापति शेरबहादुर देउवाले पदाधिकारी र पूर्व पदाधिकारीबीच मेयर उपमेयरबारे बालुवाटारमा सहमति गरेर सानेपा जान चाहेपछि बैठक सरेको सानेपा स्रोतले बतायो ।

सहमतिको खोजीमा शुक्रबार रातिसम्म बालुवाटारमा छलफल भएपनि सहमति हुन नसकेपछि अहिले पनि छलफल चलिरहेको छ ।