एजेन्सी । रुसी सेनाले युक्रेनी सैनिकलाई हतियार बिसाउन अन्तिम अल्टिमेटम दिएको छ ।

युक्रेनको मारिउपोलस्थित स्टिल प्लान्टमा आश्रय लिइरहेका सेनालाई रुसले हतियार बिसाउन अन्तिम अल्टिमेटम दिएको हो ।

तर, सैनिकहरुले आत्मसमर्पण नगर्ने बताएका छन्। उनीहरुले युरोपेली देशहरुसँग थप हतियारको माग गरेका छन्। यसैबीच मारिउपोलबाट मानिसलाई निकाल्ने काम पनि सुरु भएको छ।

रुससँगको प्रारम्भिक वार्तापछि ६ हजार मानिसलाई सुरक्षित स्थानमा सारिएको छ। तर अझै पनि १० हजार मानिस त्यहाँ फसेका छन्। उता बेलायतको रक्षा मन्त्रालयले रुसले युक्रेनमा यताउता अन्धाधुन्ध आक्रमण गरिरहेको बताएको छ ।