खोटाङ । प्रमुख प्रतिपक्षी दल नेकपा एमालेका अध्यक्ष केपी शर्मा ओलीले आगामी स्थानीय निर्वाचनमा एमालेकै जित हुने दाबी गरेका छन् । एमाले फुटेको भनिए पनि पार्टीलाई कुनै क्षति नपुगेको बताउँदै उनले कार्यकर्ताहरुलाई एमाले पहिले जस्तै रहेको भन्दै नआत्तिन आग्रह गरे ।

एमाले खोटाङले दिक्तेलमा शनिबार आयोजना गरेको जनसभालाई सम्बोधन गर्दै ओलीले भने–‘पहिले पनि एमाले फुट्यो तर जस्ताको तस्तै, अहिले पनि फुट्यो भनियो तर जस्ताको तस्तै । बरु झन् ठूलो भएको छ, त्यसैले आत्तिनु पर्दैन ।’

कार्यक्रममा उनले एमाले समृद्धिको पक्षमा उभिएकाले त्यसबाट आत्तिएर षड्यन्त्र गरेर आफू नेतृत्वको सरकारलाई परमादेशबाट हराइएको दावी गरे ।

उनले भने–‘एमाले जहिल्यै समृद्धिको पक्षमा उभिन्छ, मुलुक र जनताको पक्षमा उभिन्छ । त्यसैदेखि आत्तिएर जनादेशबाट बनेको सरकारलाई परमादेशले हरायो ।’