काठमाडौं । नेकपा एमालेका अध्यक्ष एवम् पूर्व प्रधानमन्त्री केपी शर्मा ओलीले नेपालका सबै दल मिलेर आए पनि एमालेलाई जित्न नसक्ने दाबी गरेका छन् ।

कपिलवस्तुको तौलिहवामा आज सोमवार आयोजित कार्यक्रममा अध्यक्ष ओलीले सबै दल मिलेर आए पनि एमालेलाई जित्न नसक्ने दाबी गरेका हुन् ।

उनले देशको विकास गर्नका लागि भएपनि एमालेले जित्नुपर्ने बताए । नेपाली कांग्रेस र अन्य दलबीच सरकार टिकाउन मात्र गठबन्धन गरिएको उनले आरोप लगाए । शिक्षा, स्वास्थ्य, कृषि, विमानस्थल निर्माणलगायत काम आफ्नो पालामा भएको अध्यक्ष ओलीले दाबी गरे ।

कार्यक्रममा एमाले उपाध्यक्ष विष्णु पौडेलले आउँदो स्थानीय तहको चुनावमा एमालेको जितलाई कसैले रोक्न नसक्ने बताए । आजै एमालेमा प्रवेश गर्नुभएका सांसद वृजेशकुमार गुप्ताले मधेसको विकास र मधेसीको हितमा काम गर्ने दल एमाले मात्र भएको उल्लेख गरेका छन् ।