काठमाडौं । नेपाल राष्ट्र बैंकले वाणिज्य बैंकहरुसँग सात लाख वा सोभन्दा बढी नगदमा भएका कारोबारहरुको पूर्ण विवरण पठाउन निर्देशन दिएको छ । राष्ट्र बैंकको सुपरीवेक्षण विभागले बैंकहरुलाई पत्र काटेर उक्त निर्देशन दिएको हो । राष्ट्र बैंकले माघ २४ गतेसम्म उक्त विवरण पठाई सक्न बैंकहरुलाई निर्देशन दिएको हो ।

उक्त निर्देशन अनुसार अब बैंकहरुले गत साउनदेखि पुससम्म भएका ७ लाख रुपैयाँभन्दा बढीको नगद कारोबार गर्नेको नाम, खाता नम्बरसहित रकम कहिले र किन निकालेको हो ? लगायत सबै विवरण राष्ट्र बैंकमा पठाउनुपर्ने भएको छ ।

१० लाख रुपैयाँभन्दा बढीको नगद कारोबार गर्न नपाइने अहिलेको नियम भएपनि अहिले भने राष्ट्र बैंकले ७ लाख रुपैयाँभन्दा माथिका सबै नगद कारोबारको विवरण मागेको हो । सुपरीवेक्षण विभाग अन्तर्गतको सम्पत्ति शुद्धीकरण अनुगमन इकाईले सम्पत्ति शुद्धीकरण तथा आतंकवादी कृयाकलापमा वित्तीय लगानी निवारणको अवस्थाबारे गैरस्थलगत सुपरिवेक्षणको क्रममा यस्तो विवरण माग गरेको राष्ट्र बैंकको पत्रमा उल्लेख छ ।

खासगरी पछिल्लो समयमा क्रिप्टोकरेन्सी लगायत गैरकानुनी डिजिटल कारोबारमा बैंकहरुको निक्षेप उपयोग भएको आशंकामा राष्ट्र बैंकले नगद कारोबारको विवरण मागेको जनाइएको छ ।